Vijaykhant Requests keralites to stop Racism: கேரளாவில் தமிழர்கள் தாக்கப்படுவதை, அம்மாநில அரசும், மத்திய அரசும் தடுத்து நிறுத்த வேண்டும்

Vijaykhant Requests keralites

கேரளாவில் தமிழர்கள் தாக்கப்படுவதை, அம்மாநில அரசும், மத்திய அரசும் தடுத்து நிறுத்த வேண்டும் என்று தேமுதிக தலைவர் விஜயகாந்த் வலியுறுத்தியுள்ளார்.

இதுகுறித்து அவர் இன்று வெளியிட்ட அறிக்கையில், "தமிழகத்தில் இருந்து கேரளாவுக்கு செல்லும் அய்யப்ப பக்தர்களை கேரள சமூக விரோதிகள் அடித்து துன்புறுத்துகிறார்கள் என்றும், அதனால் அய்யப்ப பக்தர்கள் பாதிப்புக்கும், தவிப்புக்கும் உள்ளாகி உள்ளனர்.

அதோடு பஸ் பயணிகளும் தாக்கப்படுகிறார்கள் என்றும் அறிய வருகிறேன். இது மிகுந்த வருத்தத்தையும், வேதனையும் அளிக்கிறது. இது தமிழ்நாடு, கேரளாவுக்கும் இடையே நிலவி வரும் உறவுக்கு நல்லதல்ல.

மக்களுடைய உயிர்களுக்கும், உடமைகளுக்கும் பாதுகாப்பு அளிக்க வேண்டியது கேரள அரசின் கடமையாகும். பாதிக்கப்பட்ட மக்கள் புகார் கொடுத்தாலும் கேரளாவைச் சேர்ந்த காவல்துறையினர் கண்டு கொள்ளாமல், அங்குள்ள சமூக விரோதிகளுக்கு அவர்கள் உடந்தையாகவும் உள்ளனர் என்றும் தகவல்கள் தெரிவிக்கிறது.

இது இந்திய ஒருமைப்பாட்டுக்கு வேட்டு வைப்பதாகும். இதைத் தட்டிக் கேட்க வேண்டிய இந்திய அரசோ மௌனம் காக்கிறது. பிரச்னை இந்த அளவுக்கு வளர மத்திய அரசுதான் காரணம். 2006 ஆம் ஆண்டே முல்லைப் பெரியாறு அணையின் நீர்மட்டத்தை 142 அடியாக உயர்த்தலாம் என்று உச்ச நீதிமன்றம் அளித்த தீர்ப்பை இந்திய அரசு நிறைவேற்றி இருந்தால் இன்று இந்த கலவரம் ஏற்பட்டு இருக்காது.

இந்திய அரசும் காங்கிரஸ் கட்சியின் கையில் தான் உள்ளது. கேரளாவிலும் காங்கிரஸ் ஆட்சிதான் நடக்கின்றன. இருப்பினும் அப்பாவித் தமிழ் மக்கள் கேரளாவில் தாக்கப்படுவதை இந்திய, கேரள அரசுகள் வேடிக்கை பார்த்துக் கொண்டிருப்பதை வன்மையாகக் கண்டிக்கிறேன்.

கேரளாவைச் சேர்ந்த சமூக விரோதிகள் மீதும், இப்பிரச்னைக்கு காரணமானவர்கள் மீதும் இந்திய அரசும், கேரள அரசும் உடனடியாக நடவடிக்கை எடுத்து தமிழக மக்கள் தாக்கப்படுவதை நிறுத்தவேண்டும் என்று கேட்டுக் கொள்கிறேன்.

பலவீனம் அணையில் இல்லை, கேரள அரசியல்வாதிகளிடம்தான் உள்ளதோ என்று சந்தேகம் எனக்கு வருகிறது," என்று விஜயகாந்த் கூறியுள்ளார்.

தேமுதிக: தேர்தலில் மக்கள் ஆதரவு கூடுகிறது | Our Stonghold is Growing- D.M.D.K

ஒவ்வொரு தேர்தலிலும் தமது கட்சிக்கு வாக்குகள் கூடிக்கொண்டே வருவதாக தேமுதிக தெரிவித்துள்ளது.

இதுகுறித்து அக்கட்சி வெளியிட்டுள்ள செய்தியில், 'தமிழ்நாட்டில் நடந்து முடிந்த உள்ளாட்சி மன்றத் தேர்தலில் தேமுதிக தனித்துப் போட்டியிட்டு 863 இடங்களில் வெற்றி பெற்றுள்ளது.

இது கடந்த 2006-ம் ஆண்டு நடைபெற்ற உள்ளாட்சி மன்ற தேர்தலில் வெற்றி பெற்ற இடங்களை விட 248 இடங்களில் கூடுதலாக வெற்றி பெற்று 40 சதவீதம் இடங்களை அதிகம் பெற்றுள்ளது.

தேமுதிக தனித்துப் போட்டியிட்ட ஒவ்வொரு தேர்தல்களிலும் தமிழக மக்களின் ஆதரவு பெருகியுள்ளது.

கடந்த 2006-ம் ஆண்டு சட்டமன்றத் தேர்தலில் சுமார் 28 லட்சம் வாக்குகளும், 2009-ம் ஆண்டு பாராளுமன்ற தேர்தலில் சுமார் 31 லட்சம் வாக்குகளும், 2011-ம் ஆண்டு உள்ளாட்சி மன்ற தேர்தலில் 35 லட்சத்து 64 ஆயிரத்து 74 வாக்குகளும் பெற்றுள்ளது.

இதன் மூலம் ஒவ்வொரு தேர்தலிலும் தமிழக மக்களின் ஆதரவு தேமுதிகவுக்கு கூடிக் கொண்டே வருகிறது என்பது உண்மையாகும்,' என்று அந்தச் செய்தியில் தெரிவிக்கப்பட்டுள்ளது.

தேர்தல் ஆணையத்தின் அங்கீகாரத்தை இழக்கிறது பாமக | பாட்டாளி மக்கள்

தமிழக சட்டப்பேரவைத் தேர்தலின் ஏற்பட்ட கடும் வீழ்ச்சியின் காரணமாக, தேர்தல் ஆணையத்தின் அங்கீகாரத்தை பாட்டாளி மக்கள் கட்சி இழக்கவுள்ளது.

அதேவேளையில், குறிப்பிடத்தக்க எழுச்சியின் பலனாக தேமுதிகவுக்கு தேர்தல் ஆணையத்தின் அங்கீகாரம் கிடைக்கவுள்ளது.

தேர்தல் ஆணையத்தின் அங்கீகாரம் பெற வேண்டும் என்றால், ஒரு கட்சி கடைசியாக நடந்த நாடாளுமன்றத் தேர்தலில் 6 சதவீதத்துக்கு குறையாமல் வாக்குகளைப் பெறுவதுடன், குறைந்தது ஒரு மக்களவை உறுப்பினரை பெற்றிருக்க வேண்டும்; வாக்கு சதவீதத்தை கணக்கில் எடுத்துக் கொள்ளாத பட்சத்தில், அக்கட்சி சார்பில் 2 மக்களவை உறுப்பினர்கள் தேர்ந்தெடுக்கப்பட்டிருக்க வேண்டும்.

இல்லையேல், கடைசியாக நடந்த சட்டப்பேரவைத் தேர்தலில் 6 சதவீதத்துக்கு குறையாத வாக்குகளை பெறுவதுடன், அக்கட்சியில் இருந்து குறைந்தது 2 எம்.எல்.ஏ.க்கள் தேர்ந்தெடுக்கப்பட்டிருக்க வேண்டும். வாக்கு சதவீதம் கணக்கில் எடுத்துக்கொள்ளாத பட்சத்தில், குறைந்தபட்சம் 8 எம்.எல்.ஏ.க்கள் வெற்றி பெற்றிருக்க வேண்டும்.

இந்த நான்கு நிபந்தனைகளை பூர்த்தி செய்யாத காரணத்தால், தேர்தல் ஆணையத்தின் அங்கீகாரத்தை பாமக இழக்கவுள்ளது.

அண்மையில் நடந்து முடிந்த தமிழக சட்டப்பேரவைத் தேர்தலில் பாமக 5.23 சதவீத வாக்குகளை மட்டுமே பெற்றுள்ளது. மேலும், அக்கட்சியைச் சேர்ந்த 3 பேர் மட்டுமே எல்.எல்.ஏ.க்களாக தேர்ந்தெடுக்கப்பட்டுள்ளனர்.

முன்னதாக, கடந்த 2009-ல் நடைபெற்ற நாடாளுமன்றத் தேர்தலில் பாமக ஓரிடத்தில் கூட வெற்றி பெறவில்லை. இதனால், அக்கட்சியால் தேர்தல் ஆணையத்தின் ஒரு நிபந்தனையைக் கூட நிறைவேற்ற முடியாமல் போனது.

கடந்த நாடாளுமன்ற தேர்தலின்போதே புதுச்சேரியில் பாமக தனது அங்கீகாரத்தை இழந்துவிட்டதும் குறிப்பிடத்தக்கது.

தேமுதிகவுக்கு அங்கீகாரம்...

தமிழக சட்டப்பேரவைத் தேர்தலில் வென்று 29 எம்.எல்.ஏ.க்களை பெற்றிருப்பதன் மூலம் தேமுதிகவுக்கு தேர்தல் ஆணையத்தின் அங்கீகாரம் கிடைக்கிறது.

முந்தைய சட்டப்பேரவைத் தேர்தலில் 6 சதவீதத்துக்கும் அதிகமான வாக்குகளுடன் ஒரு சட்டப்பேரவை தொகுதியில் தேமுதிக வென்றது. ஆனால், அடுத்து நடந்த நாடாளுமன்ற தேர்தலில் ஒருவர் கூட வெற்றி பெறாததால், அக்கட்சிக்கு தேர்தல் ஆணையத்தின் அங்கீகாரம் கிடைக்கவில்லை.

இந்த நிலையில், அண்மையில் நடந்து முடிந்த சட்டப்பேரவைத் தேர்தலில் தேமுதிகவுக்கு 7.88 சதவீத வாக்குகள் கிடைத்துளது. அத்துடன், அக்கட்சியை சேர்ந்த 29 வேட்பாளர்கள் வெற்றி பெற்றுள்ளனர். இதனால், தேமுதிகவுக்கு தேர்தல் ஆணையத்தின் அங்கீகாரம் மீண்டும் கிடைக்கவுள்ளது.